ЭРҮҮЛ МЭНД

Мэдээ 2009.11.05

2009 оны 11 дүгээр сарын 05-ны өдрийн 10 цагийн байдлаар томуугийн А (H1N1) вирүсийн халдварын лабораториор батлагдсан тохиолдол 884 болж, 25 шинэ тохиолдлоор нэмэгдсэн, үүнээс Улаанбатарт 706, 17 аймагт 178 тохиолдол бүртгэгдсэн байгаа, өчигдрийнхээс нэмэгдсэн нь Сэлэнгэд +7, Өвөрхангайд +2, УБ +16 болжээ.

ХӨСҮТ-ийн амбулаториор 140 хүн үзүүлж үйлчлүүлсэнээс 8 хүн томуугийн А (H1N1) вирүсийн халдварын хүнд, хүндэрч болзошгүй хэлбэр гэсэн оношоор хэвтсэн. Бусад нь гэрээр эмчилгээ хийлгэх зөвлөгөө авч, өрхийн эмчийн хяналтанд орсон байна.

Томуугийн халдвар эхэлсэнээс хойш тус төвд томуугийн А (H1N1) вирүсийн халдвар гэсэн оношоор 411 хүн хэвтэн эмчлэгдсэнээс 322 нь эдгэрч гарсан, одоо 88 өвчтөн эмчлэгдэж байна. Хүндээр өвчилж эрчимт эмчилгээ сэхээн амьдруулах тасагт эмчлэгдсэн 20-иод тохиолдлоос 1 нь нас барсан, бусад нь эдгэрч гарсан, одоо 5 хүний биеийн байдал хүнд байна.

Сүүлийн хоногуудад хүнд байсан хүмүүсээс 2 хүний биеийн байдал дээрдэж сайжрах хандлагатай болж байна. ХӨСҮТ-ийн ТҮТ-ийн лабораторид 109 сорьцод шинжилгээ хийснээс 25 тохиолдол томуугийн А (H1N1) вирүсийн халдвар болох нь батлагдсан байна.

Аймгуудтай байнгын холбоотой ажиллаж өдөр бүр 1-2 аймагтай аудио хурал хийж зөвөлөгөө өгч байгаа. Иргэдийн зүгээс өөрийгөө томуугийн А (H1N1) вирүсийн халдвар авч уу? үгүй юу? Хэд хоногийн өмнө бие эвгүй оргиод томуу хүрээд өнгөрөх шиг болсон тэр юу байсан бол?

Манай гэр бүлээс эсвэл ажлын газрынхнаас, ангийнхнаас хэн нэг нь өвдөөд эдгэрсэн би хамт байсан яагаа бол?

Шинжилгээ хийлгээд өөрийгөө өвдөж өнгөрсөн эсэхээ мэдчих юмсан гэсэн санаатай эмнэлгээр яваад байгаа тал байна. Ийм тохиолдолд шинжилгээ хийхгүй. ДЭМБ-аас өгч байгаа зөвлөмжид тухайн улс оронд томуугийн А (H1N1) вирүсийн халдварын 100 тохиолдол лабораториор батлагдсан бол хүн амын дунд энэ өвчний дэгдэлт гарч байгаа нь тодорхой байна гэж үзээд цаашид нийтийг хамарсан шинжилгээ хийх шаардлагагүй, томуу, томуу төст өвчтэй гэж оношлогдож байгаа тохиолдлыг “томуугийн А (H1N1) вирүсийн халдвартай“ гэж оношлож, эмчлэх арга хэмжээ авах нь зүйтэй гэж байгаа.

Нэгэнт дэгдэлтийн байдалтай гарч байгаа үед хүн амын 20-50% дайрлагад өртөж, шинж тэмдэг бүхий хэлбэрээр илрэнэ, үүнээс 90-ээд хувь нь хөнгөн хэлбэрээр өвчилж эдгэрнэ гэж зөвлөж байгаа. Та түүний нэг нь байх магадлалтай. Хэрэв өвчилсөн шинж тэмдэг, сэжиг байгаа бол гэртээ байж, өрхийн эмчээ дуудаж үзүүлээрэй.

Тэд өвчин хүнд байна уу? Хөнгөн байна уу? Гэрт нь эмчлэх үү? Эмнэлэгт хэвтүүлэх шаардлагатай юу гэдгийг тогтоох хэмжээнд бүрэн сургагдсан, энэ талаар баримтлах маш тодорхой удирдамжтай байгаа. Өрхийн эмч нар уртасгасан цагаар, гэрийн дуудлага, эргэлтийн горимоор байнга ажиллаж байгаа.

ХӨСҮТ

Томуугийн А хүрээний /H1N1/ вирусийн халдвар хурдацтай тархаж байгаа учир 2009 оны 11 дүгээр сарын 03-ны өдрөөс эхлэн орон даяар өндөржүүлсэн бэлэн байдалд шилжин ажиллахаар боллоо.
Монгол Улсын Ерөнхий сайдын захирамжаар байгуулагдсан Засгийн газрын ажлын хэсэг хуралдан шийдвэр  гаргаж, ажлын хэсгийн ахлагч, Монгол Улсын Шадар сайд М.Энхболд энэ талаар мэдээлэл хийв.
Томуугийн А хүрээний /H1N1/ вирусийн халдварыг тархаахгүйн тулд ирэх 14 хоногт барааны захыг ажиллуулахгүй, олон нийтийг хамарсан бүх төрлийн үзвэр, үйлчилгээ, диско клубын үйл ажиллагааг зогсоолоо.
Мөн хот хоорондын зорчигч тээврийн үйлчилгээг хязгаарлан, зорчигчдын биеийн байдлыг үзэж зорчуулах, хүн тээврийн үйлчилгээнд явж байгаа автомашинуудыг ариутгаж, халдваргүйжүүлж байхаар  боллоо.
Хот, орон нутагт зохиогдох төрөл бүрийн хурал, зөвлөгөөн, ээлжит цэрэг татлагыг 14 хоногоор хойшлуулж оюутны хотхон, дотуур байранд эмнэлгийн үйлчилгээ үзүүлэхээр шийдвэрлэв.
14 хоногийн хугацаанд сургууль, цэцэрлэг ажиллахгүй тул Боловсрол, соёл, шинжлэх ухааны яам, телевизүүд хамтарч Ерөнхий эрдмийн зарим нэг  хичээлийг телевизээр заах арга хэмжээ авахыг ажлын хэсэг үүрэг болголоо.
Нийслэлийн Засаг даргын Тамгын газар улсын нөөцөөс ариутгал, цэвэрлэгээний 2 автомашин авах бол нэр бүхий хоёр аж ахуйн нэгж эмнэлгүүдийг хүчилтөрөгчөөр тасралтгүй хангах үүрэг хүлээлээ.
Цэргийн клиникийн төв госпиталь, ЭНЭШТ, Ачтан-Элит, Нялхсын клиникийн сувилал, Төрийн тусгай албан хаагчдын нэгдсэн эмнэлэгт нийт   255 ор нэмж ажиллуулан, ядуу, олон хүүхэдтэй, байнгын асаргаанд хэвтэрт байдаг, орон гэргүй хүмүүс болон жирэмсэн, хөхүүл хүүхэдтэй эхчүүдэд 1 тэрбум төгрөгийн үнэ бүхий биеийн эсэргүүцэл сайжруулах аарц, жимс зэрэг хүнсний нэмэлт бүтээгдэхүүн өгөхөөр  боллоо.
Мөн эмзэг бүлгийн иргэдэд туслах хандивын аян өрнүүлэхийг аж ахуйн нэгж, шашны байгууллагуудад уриаллаа.
2009 оны 11 дүгээр сарын 03-ны байдлаар улсын хэмжээнд 812 хүн томуугийн А хүрээний /H1N1/ вирусээр өвчилж 5 хүн нас бараад байна. 35 хүн эдгэрч эмнэлгээс гарсан бол 53 хүн Халдварт өвчин судлалын үндэсний төвд хэвтэн эмчлүүлж байна

http://www.eruul-mend.com нь олон Нийтэд хандан уриалга гаргаж байна.

Ханиад томууны шинж тэмдэг илэрсэн тохиолдолд өрхийн эмч болон харъяа нутаг дэвсгэрийн эмнэлэгтээ заавал үзүүлж эмчийн зааврын дагуу эм уух, /дур мэдэн эм хэрэглэх нь эмчилгээний үр дүн багатайгаас гадна үр дүнгүй буруу эм авах нь санхүүгийн алдагдалтай/

Ханиад томуу хүрсэн бол бусдад халдвар тараахаас болгоомилж амны хаалт хэрэглэх /2цаг тутам солих шаардлагатай, та ханиадтай үедээ өдөрт 15 хүнд халдвар тараадаг/

Биеийн дархлаагаа сайжруулах төрөл бүрийн арга хэрэглэх /биеийн тамираар хичээллэх, Халуун аарц, сүү, аньс, чацарганы жүүс буцалгаж уух. Витамин С хэрэглэх, Сармистай шөл уух, утлага хийх, халуун ванн болон саунд суух/

Ариун цэврийг сахих /Гараа бохирдох бүрт савандаж угааж занших, бохир гараар ам, хамар, нүдээ ухахгүй байх/

Хорт зуршлаас ангид байх /архи уух нь дархлаа сулруулна, тамхи татах нь амьсгалын замд ассан түймэр мэт, та ханиад хүрвэл илүү хүндэрч амь нас тань хутганы ирэн дээр байгаа мэт болно. Архи арван нас, тамхи таван нас хорооно/

Даарч хөрөхөөс болгоомжил /даарсан тохиолдолд та шууд ханиад хүрнэ. Дулаан бол мянган лан/

Энэхүү мэдээллийг илүү олон хүнд хүргэх /илүү олон хүн мэдсэнээр ханиаднаас сэргийлэх хүний тоо нэмэгдэж эх орны минь эдийн засагт сайнаар нөлөөлнө.. Ханиад томууны талаар мэдлэггүй хүн олон байх нь энэ даяршиж иргэншсэн нийгмийн үед танд ч бас тойруу замаар ч гэсэн муугаар нөлөөлнө. Бид нэг нэгнээсээ хамааралтай нийгэмд амьдарч байна./

http://www.eruul-mend.com

НИЙСЛЭЛИЙН ЭРҮҮЛ МЭНДИЙН ГАЗраас ТОМУУ ӨВЧИН ИХСЭЖ БАЙГААТАЙ ХОЛБОГДУУЛАН 24 цагаар ажиллаж буй эмийн сангууд